જામ્યો વર્ષાનો માહોલ

વાદળે વગાડ્યા ઢોલ, જામ્યો વર્ષાનો માહોલ,
વીજળીનો નથી તોલ, જામ્યો વર્ષાનો માહોલ.
કાળાં કાળાં વાદળ,
એની લીલા છે અનેરી;
વીજ વાતો કરવા,
જાણે લેતી એને ઘેરી,
મોતી વરસે અણમોલ, જામ્યો વર્ષાનો માહોલ,
વાદળે વગાડ્યા ઢોલ, જામ્યો વર્ષાનો માહોલ.
આમ છોડે, તેમ છોડે,
વાદળ જળ છૂટું મૂકે;
નાનાં-મોટાં ફોરાં પડે,
ઝાડ કેરાં પાન ઝૂકે,
માનવ મન મૂકી ડોલ, જામ્યો વર્ષાનો માહોલ,
વાદળે વગાડ્યા ઢોલ, જામ્યો વર્ષાનો માહોલ.
– ‘સાગર’ રામોલિયા